Башҡортостандың атҡаҙанған артисы Азат Йыһаншин 1971 йылдың 11 майында Баймаҡ ҡалаһында тыуған. 1990-94 й.й. Өфө сәнғәт институтында белем ала. Уҡыу йортон тамамлағас йәш белгесте Стәрлетамаҡ дәүләт театр берләшмәһенә ҡабул итәләр. Ошо уҡ йылдарҙа «Аҡйондоҙ» эстрада төркөмөн ойоштора һәм киң билдәлелек яулай. 1995 йылдан Милли йәштәр театрында эш башлай. 1996 йылда Мостай Кәримдең «Салауат» драмаһында Илеш роле өсөн Азат Йыһаншин республикабыҙҙың Ш.Бабич исемендәге йәштәр премияһына лайыҡ була. 1998-2008 й.й. Мәжит Ғафури исемендәге Башҡорт дәүләт академия драма театрының төп артистарының береһе. 2002 йылда артист театр һәм милли сәнғәт үҫешенә индергән тос өлөшө өсөн Башҡортостандың атҡаҙанған артисы тигән маҡтаулы исем менән бүәлкләнә. 2008 йылда Азат Йыһаншиндың ижади карьераһында үҙгәрештәр барлыҡҡа килә – Стәрлетамаҡ башҡорт драма театрына ҡуйыусы режиссер, 2009 – баш режиссер, 2012 – театрҙың художество етәксеһе итеп тәғәйенләнә. Азат Йыһаншин Стәрлетамаҡ театрына яңы һулыш өрә, төрлө спектаклдәр ҡуйыла. Азат Надир улының эштәре социаль йүнәлешле булыуы менән айырыла, режиссер илдә барған үҙгәрештәргә битараф түгел һәм был ул сығарған спектаклдәрҙә лә асыҡ сағыла. 2014 йылдың июль айынан Салауат башҡорт драма театры директоры булып эшләй.