Башҡортостанда Мостай Кәримгә бағышланған энциклопедия сығасаҡ. Был үҙенсәлекле китапта М. Кәримдең шиғырҙары, уның ижад һәм тормош юлы, мәҙәни бәйләнештәре тураһында төрлө әҫәрҙәр урын аласаҡ. Энциклопедия Башҡортостан Республикаһының Президенты «Башҡортостандың халыҡ шағиры Мостай Кәримдең иҫтәлеген мәңгеләштерергә» тигән указына яраҡлы итеп сығарыла. Уның сығарылышы өҫтөндә Башҡортостан энциклопедияһының мәҙәниәт бүлеге хеҙмәткәрҙәре эш алып бара. Әлеге көндә энциклопедияны сығарыу өҫтөндә 100-гә яҡын кеше эшләй, улар араһында Рәсәйҙең төрлө төбәктәрендә йәшәүсе яҙыусылар, әҙәбиәтселәр, журналистар бар.
Әҙәбиәтселәр әйтеүе буйынса, Мостай Кәрим күп милләтле республикабыҙҙың яратҡан әҙибе. Ул башҡорт әҙәбиәтен элекке Бөтә Союз, бөтә донъя поэзияһына яҡты йондоҙо итеп балҡытты. Башҡортостандың халыҡ шағиры, С. Юлаев исемендәге дәүләт һәм Рәсәй Федерацияһының Максим Горький исемендәге дәүләт, Михаил Шолохов исемендәге халыҡ-ара премиялар лауреаты, Социалистик Хеҙмәт Геройы М. Кәримдең әҫәрҙәрендә һәр кеше, һәр шәхес үҙен таба.
Мостай Кәрим өлкәндәргә генә түгел, балалар өсөн дә бик күп хикәйәләр, әкиәттәр яҙа, балалар донъяһы уға бик яҡын һәм һәр саҡ уның иғтибар үҙәгендә була. Уның әҫәрҙәре төрлө телдәргә тәржемә ителгән, сәхнәлештерелгән, кинолар һәм спектаклдәр ҡуйылған.
Энциклопедияны баҫтырып сығарыу өсөн, бер нисә йыл кәрәк буласаҡ, әлегә уның сығыу көнөн Башҡортостан энцеклопедияһында иҫбатлай алмайҙар. «Башҡортостандың мәҙәни донъяһы» порталы