Мәжит Ғафури исемендәге Башҡорт академия драма театры сәхнәһендә 5-се йыл рәттән ҙур уңыш менән барған «Мулла» (Т.Миңнуллин, реж. А.Абушахманов) спектакле хәҙерге тормоштоң үҙәк мәсьәләләрен асып һала. Шул йәһәттәнме, ул халыҡ араһында оло иғтибар яуланы. Ошо арала был спектакль 75-се тапҡыр ҡуйылды.

5 йыл арауығында ул күп ҡала һәм райондарҙа күрһәтелеп, тамашасы тарафынан юғары баһаланды. Әйтәйек, Ҡазан, Сибай, Нефтекама, Салауат ҡалаларында, Әлшәй, Миәкә, Бишбүләк, Дәүләкән, Баймаҡ, Әбйәлил һәм башҡа күп райондарҙа ул ҙур аншлаг тыуҙырҙы. Йәштәр һәм ололар колонияһында ла ҡуйылып, аҙаҡ театрға күп хаттар килде, күптәр дин менән ҡыҙыҡһына башлыуын хәбәр итте.

Бөгөн, йәғни 27 ғинуар, «Мулла» спектакле тамашасыға яңылыҡ әҙерләй: төп роль Әсфәндиәрҙе Руслан Хайсаров, Нәлимәне Ирада Фазлаева һәм Гөлназды Римма Ҡаһарманова уйнаясаҡ. 

Яратҡан спектаклегеҙҙе башҡа артистар башҡарыуында ла баһалап ҡарағығыҙ килһә, театрға рәхим итегеҙ!