Ошо көндәрҙә Хәйбулла районының бай тарихлы ауылдарының береһе тураһында китап сыҡты. Унда ауылға бәйле тарихи ер-һыу атамалары тураһында риүәйәттәр, легендалар урын алған.

Ауыл тураһында айырым китап баҫылыуы Мәмбәт халҡы өсөн ысын байрамға әүерелде. Башҡортостан йылъяҙмаһында тәрән эҙ ҡалдырған ауыл тарихын Дауыт Ҡыуандыҡов үҙ әҫәрҙәрендә сағылдырған. Автор һүҙҙәренсә, ул ауыл аҡһаҡалдары һөйләгән риүәйәттәрҙе бәләкәйҙән теркәп барған. Олоғайғас, хеҙмәт ветераны хыялын тормошҡа ашыра.

Китаптың исем туйына ауыл халҡы, йәштәр йыйылды. Үткәндәрҙе йәш быуынға еткереү маҡсатында яҙылған әҫәр, автор фекеренсә, тотош ауылдаштарының хеҙмәт емеше. Дауыт Ҡыуандыҡов материалдарҙы туплау, теркәү менән шөғөлләнһә, уның нәшер ителеүенә Башҡортостандың халыҡ шағиры Ҡәҙим Аралбай булышлыҡ иткән. Өс йөҙ данала баҫтырылған китаптың бер өлөшө район мәктәптәре һәм китапханаларына таратыласаҡ. Урында йәшәүселәр фекеренсә, был китап оло эштең башы ғына. Сөнки өйрәнелмәгән риүәйәттәр, тарихи урындар әле бихисап.