РСФСР-ҙың атҡаҙанған, Башҡортостандың, Татарстандың халыҡ артисы Фәриҙә Ҡудашева- ҡабатланмаҫ, үҙенә генә хас башҡарыу оҫталығына эйә булған легендар йырсы. Уның һоҡландырғыс ижады милли сәнғәтебеҙҙә юйылмаҫлыҡ эҙ ҡалдырҙы һәм башҡорт эстрадаһы үҫешенә ҙур йоғонто яһаны. Ошо көндәрҙә мәшһүр йырсының тыуыуына 95 йыл тула. Шул уңайҙан респуликабыҙҙа бик күп мәҙәни саралар үткәреү ҡаралған. 14 декабрҙә көндөҙгө сәғәт 12-лә Фәриҙә Ҡудашева йәшәгән Октябрь революцияһының 9-сы һанлы йортонда мемориаль таҡтаташ асыла. Иҫегеҙгә төшөрәбеҙ, октябрҙә Башҡорт дәүләт филармонияһы таҡтаташ ҡуйыу өсөн аҡса йыйыу тураһында иғлан иткәйне. Шулай уҡ, был көндө көндөҙгө сәғәт 3-тә Мосолман зыяратында йырсының ҡәберенә сәскәләр һалыуойошторола. Киске сәғәт 7-лә «Башҡортостан» дәүләт концерт залында күренекле мәҙәниәт эшмәкәре Фәриҙә Ҡудашеваның ижадын һөйөүселәр өсөн «Фәриҙә моңдары — беҙҙең күңелдәрҙә» исемле юбилей кисәһе үтә. Унда Башҡорт дәүләт филармонияһы солистары ҡатнаша. Улар йырсының репертуарындағы йырҙарҙы башҡарасаҡ. Иғтибар итегеҙ! «Башҡортостан» дәүләт концерт залында уҙасаҡ концерт тәүҙә 15 декабргә филармонияла планлаштырылғайны, билеттар ғәмәлдә.