Төрлө уйындар, фекер алышыу менән үрелеп барған байрам тыуған төйәгенән ситтә белем алыусы йәштәрҙе бергә тупланы.

Ҡала үҙәгенән 50 саҡрым - һәм кесе Башкортостан башлана. Етенсе йыл рәттән Мәскәүҙә йәшәүсе һәм эшләүсе яҡташтар бергә йыйыла. Һәр ваҡыттағыса, улар социаль селтәрҙәр һәм башҡорт нөктә сом сайты аша берләшеп, һабантуй ойоштора.

Байрам өсөн барыбыҙ ҙа яуаплы - һабантуйҙың төп девизы ошо. Йәштәр үҙҙәре финанс яғын да ҡайғырта, мәҙәни сараларҙы ла ойоштора. Шуға ла байрамға килеүселәр билет алырға тейеш. Һуңынан инде концерт, милли уйындар, тәмле төшкө аш, ә тәьҫораттарҙы баһалап бөткөһөҙ.

Әйткәндәй, һабантуй әкренләп йәштәр статусын юғалта бара. Студенттар менән бергә ололар ҙа ихлас күңел асты. Быйыл байрам 300 - ҙән ашыу кешене тупланы.

Байрам тәрбиәүи йәһәттән дә әһәмиәтле. Мәҫәлән, бында иҫерткес эсемлектәр, тәмәке тартыу тыйылған. Ә төрлө милли йолалар, уйындар менән ҡыҙыҡһыныусы балаларға ололар аңлатма бирә. Йәштәр иһә яңы дуҫтар, ижадташтар таба. Ғәзиз тыуған ер, тамырҙар, тел һәм мәҙәниәт - яҡташтарҙы тап ошо күҙгә күренмәгән бәйләнеш бергә туплай, берләштерә лә инде. Шуға ла йәштәр туғандарса аралашыу өсөн киләһе йыл да йәнә ошонда, үҙ һабантуйына йыйыласаҡ.

Сығанаҡ: Башҡортостан юлдаш телевидениеһы