Стәрлетамаҡ дәүләт башҡорт драма театры «Туғанлыҡ» фестивалендә «Мәскәү — Васютки» спектаклен тәҡдим итә. Күренекле драматург Флорид Бүләковтың был пьесаһы буйынса ҡуйылған спектаклдең режиссеры Башҡортостандың атҡаҙанған артисы, Шәйехзада Бабич исемендәге дәүләт йәштәр премияһы лауреаты Азат Йыһаншин. Былтыр Стәрлетамаҡ ҡалаһында уҙған “Башҡорт драматургияһы" фестивалендә "Мәскәү — Васютки" спектакле "Иң яҡшы режиссура" номинацияһында еңеү яулағайны.

Был спектакль үтеп барған ғүмер тураһында. 

Онотолған станциялағы тәгәрмәсһеҙ иҫке вагонда ҡарт менән ҡарсыҡ йәшәй. Уларҙың һигеҙме, туғыҙмы балаһы бар. Дөрөҫөрәге, алтынсыһының исемен иҫләмәйҙәр. Үткәндәргә сәйәхәт ҡылып, балаларының исемдәрен хәтерләп ҡарайҙар. Бер-береһенә үпкәләп тә алалар. Ҡарт балаларын ата-әсәһен онотоуҙа ғәйепләй, ә ҡарсыҡ, һәр әсә кеүек, уларҙың мәшәҡәттәре күплегенә һылтанып, яҡлап маташа... 

Шуны ла әйтеп китергә кәрәк, спектаклдең режиссеры Азат Йыһаншин, төп ролдәрҙе башҡарған Башҡортостандың халыҡ артистары Миңниса менән Филарит Бакировтар һәм спектаклдең рәссамы Альберт Нестеров Салауат Юлаев исемендәге дәүләт премияһына тәҡдим ителделәр.