Рәсәйҙең баш ҡалаһында бындай сара ғәҙәти күренешкә әйләнә бара. Әүҙем йәштәр тыуған ерҙәренән ситтә лә юғалып ҡалмай.

Ҡыҙыҡлы уйын Орджоникидзе исемендәге Рәсәй геологик эҙләнеүҙәр университетының тамашалар залын гөрләтте. Шаянлыҡҡа һәм тапҡырлыҡҡа дүрт команда көс һынашты. Баймаҡ районынан баш ҡалала белем алыусы студенттар «Ҡаймаҡ» исемле команда төҙөнө. Башҡа район студенттары иһә «Үәт, әй, теүәтәй» һәм «Башмикс» командаларына бүленде. Ә ағалы-һеңлеле Миләүшә менән Фидан Әбсалиҡовтар икәүләп «М-Мдемс» командаһы аҫтында берләште.

«М-Мдемс»тар ысынлап та, һынатманы. Фидандың актерлыҡ һәләте тамашасыларҙы тәүге сығыштан уҡ ихлас көлөргә мәжбүр итте. Һөҙөмтәлә улар беренсе урынға лайыҡ булды. Быйылғы ярыш ҡатнашыусыларҙан күп көс талап итте. Айырыуса, видеофильмдарҙан өҙөктәрҙе башҡортсаға тәржемә итеү үҙенсәлекле булды. Был төр буйынса «Ҡаймаҡ» командаһы ал бирмәне. Йыйырға мөмкин булған дүрт бал урынына жюри ағзалары уларға 6 бал ҡуйҙы. Шулай итеп «Ҡаймаҡ»тар Гран-при яуланы. Исеме-есеменә яуап бирә тигәндәй, улар тамашасыларға ысынлап та, бер стакан ҡаймаҡ бүләк итте. Ә «Башмикс» менән «Үәт, әй, теүәтәй» командалары икенсе-өсөнсө урындар менән ҡәнәғәтләнде.