Башҡорт халҡы элек-электән ҡыр эштәрен тамамлағандан һуң, һабан туйына йыйылып, киләсәккә яңы бурыстар ҡуйған, баҫыу батырҙарын билдәләгән, киләһе уңышҡа әҙерләнгән. Ата-бабаларыбыҙҙан ҡалған йола, үҙенең мәртәбәһен юғалтмай, оҙаҡ йылдар дауамында һәр ауылда, һәр ҡалала тиерлек үткәрелә. Башҡортостанда ла баҫыу эштәре тамамланыу менән һабантуйҙар ойошҡан рәүештә шау-гөр килеп үтте, быйыл бындай халыҡ байрамдары Рәсәйҙең күп кенә төбәктәрендә ойошторолдо. Туған йолаларға, йыр-моңға һыуһаған милләттәштәр был байрамда теләп ҡатнаша. 

Мәскәүҙә лә һабантуй ойоштороу матур йолаға әйләнде. Рәсәйҙең Баш ҡалаһында үтәсәк һабантуй быйыл 30 июнгә тәғәйенләнгән. Төп саралар ҡаланың һынлы сәнғәт һәм тарих үҙәгендә, шулай уҡ Коломенск тәбиғәт музейында үтәсәк. Һабантуйҙа Башҡортостан делегацияһы ла ҡатнаша. Баш ҡала халҡы һәм ҡунаҡтарының башҡорт тирмәһендә булып, милли аш-һыуҙан ауыҙ итеп, халыҡ кәсептәренең ҡул эштәре менән танышыу мөмкинлеге буласаҡ. Байрамға бай программа әҙерләгән, Башҡортостан һәм Татарстан сәнғәт оҫталарының ҙур концерты буласаҡ. Шулай уҡ ат ярыштары, милли көрәш буйынса бәйгеләр уҙғарыла.