2014 йылдың Мәҙәниәт йылы аҫтында үтәсәге хаҡындағы Указға БР Президенты 2013 йылдың 18 июлендә ҡул ҡуйғайны. 2014 йылдың 23 ғинуарында Мәҙәниәт йылы рәсми рәүештә старт алды. Ысынлып та, исеме есеменә тап килде: был йылда республика, халыҡ-ара кимәлдә бик матур конкурстар, фестивалдәр, донъя йондоҙҙары ҡатнашлығында ҙур концерттар уҙҙы. Хәҙер йылды йомғаҡларға ла ваҡыт етте.

5 декабрҙә «Башҡортостан» дәүләт концерт залында  Мәҙәниәт йылын рәсми рәүештә ябыу тантанаһы үтә. Сарала "Башҡортостандың мәҙәни баш ҡалаһы" республика марафоны, "КЛУБ*ОК" республика конкурсы еңеүселәре билдәләнәсәк, БР Президенты Грантына лайыҡ булыусыларға дипломдар тапшырыласаҡ, сәнғәт әһелдәренә маҡтаулы исемдәр биреләсәк. Фойела Мәҙәниәт йылына бағышланған күргәҙмә эшләйәсәк.

Сараның төп биҙәге булып гала-концерт тора, өфө халҡы видео-шоуға тамаша ҡыла аласаҡ. Видео-шоуҙы һәм байрам фейерверкын һәр теләүсе ҡарай ала. 

Мәҙәниәт йылының төп йомғаҡтары 2015 йылдың февраль айында үтәсәк БР Мәҙәниәт министрлығы коллегияһы ултырышында яһаласаҡ.

Мәҙәниәт йылын бергәләп оҙатайыҡ, дуҫтар!