Учалы филармонияһы 11-се ижад миҙгелен капиталь ремонттан һуң асылған концерт залында башлап ебәрҙе. 1970 йылда төҙөлгән бина бер тапҡыр ҙа ремонтланмаған булған. 2011 йылдың яҙында зал ремонтҡа ябыла. 

Учалы филармонияһы — Башҡортостанда берҙән-бер муниципаль филармония. Ижад коллективы Рәсәйҙә һәм унан ситтә күп милләтле республикабыҙ мәҙәниәтен лайыҡлы күрһәтә. Һуңғы йылдарҙа коллектив Италия, Франция, Испания, Греция, Израилдә үткән фестивалдәр лауреаты булды, Санкт-Петербургта Бөтә Рәсәй конкурсында Гран-при яуланы.

Башҡортостан Республикаһы Президенты Рөстәм Хәмитов Дәүләт Йыйылышы-Ҡоролтайға Мөрәжәғәтнамәһендә мәҙәниәт учреждениеларының матди базаһын нығытыу, биналарҙы ремонтлау, сәхнә кәрәк-ярағы һатып алыу кәрәклеге тураһында билдәләп үтте. Республика башлығы күрһәтмәһенә ярашлы, баш ҡаланың “Нефтсе” мәҙәниәт һарайын, Конгресс-холлды, Башҡортостан дәүләт опера һәм балет театрын заманса йыһазлауға аҡса бүленәсәк. М. Нестеров исемендәге художество музейын реконструкциялаү, Башҡортостан дәүләт ҡурсаҡ театрының яңы бинаһын проектлау һәм төҙөү планлаштырыла.