5 март «Нефтселәр» мәҙәниәт һарайында «Наҙлы йөрәк серен асҡанда» исемле моң һәм илһам шишмәһе үтте. Матур байрамды БР Мәҙәниәт министрлығы, БР Яҙыусылар союзы, Бөтә донъя башҡорттары ҡоролтайы (конгресы), Республика башҡорт ҡатын-ҡыҙҙары йәмғиәте ойошторҙо. Байрам сараһының сценарий авторы Зөһрә Бураҡаева, режиссеры – Сулпан Асҡарова. 

Был кистә «Нефтселәр» мәҙәниәт һарайында алма төшөрлөк тә урын булманы, тип әйтһәк һис тә арттырыу булмаҫ. Йыр-моң һөйөүселәр яратҡан шағирәләребеҙ, Республиканың Ш.Бабич исемендәге йәштәр премияһы лауреаттары Лариса Абдуллина, Тамара Искәндәриә, Гөлназ Ҡотоева, Тәнзилә Дәүләтбирҙина, Зөлфиә Ханнанова башҡарыуында моңло ла, һағышлы ла шиғырҙар, уларҙың шиғырҙарына яҙылған йырҙар тыңлап кинәнде. Шағирәләр мөхәббәт, ғаилә, заман, тыуған яҡ, әсә һәм бала, мили темаларҙы яҡтыртҡан шиғырҙарын яңғыратты, улар тамашасының күңеленә май булып яғылды, сәмлене уйға һалды, ғәмһеҙҙе вайымһыҙлыҡтан уятты. Вәхит Хызыров, Венера Юлгилдина, Искәндәр Ғәзизов, Иҙел Нүрғәлин, Гөлдәр Ишҡыуатова «Тамыр» балалар студияһы сығыштарын тамашасы йылы ҡабул итте. Алып барыусылар Хөрмәт Үтәшев һәм Ирада Фазлаева шағирәләрҙең донъялағы әһәмиәте, илһам шишмәһе сығанағы, күңел сафлығы хаҡында һорауҙарға яуаптар эҙләне. Шағирҙарҙы һаҡларға, яҡларға кәрәк, сөнки улар бөтә донъяны мең-мең нур менән семәрләп, уратып алып, изгелек нурҙарын сәсәләр тигән фекер кисә барышында ҡыҙыл һыҙыҡ булып үтте.

«Башҡортостандың мәҙәни донъяһы» порталы