«Нефтсе» мәҙәниәт һарайында композитор Урал Рәшитовтың 50 йәшенә арналған юбилей-концерты үтте. Башҡортостан Хөкүмәте Премьер-министры урынбаҫары Зөһрә Рәхмәтуллина юбилярҙы ҡотлап, изге теләктәрен еткерҙе һәм Башҡортостандың атҡаҙанған мәҙәниәт хеҙмәткәре тигән маҡтаулы исем тапшырҙы.
Концертта Урал Рәшитовтың тормош иптәше Азалия Рәшитова, шулай уҡ ижадташ дуҫтары Айҙар Ғәлимов, Вәсилә Фәттәхова, Фәдис Ғәниев һәм Лилиә Биктимерова ҡатнашты.
Ҡасандыр автор-башҡарыусы булараҡ ижад юлын башлап ебәргән, бөгөн инде киң танылыу яулаған композитор Урал Рәшитовты Башҡортостанда белмәгән кеше бик аҙҙыр. Ул көй яҙған йырҙар республика сәхнәләрендә яңғырай. «Әлдермешкә ҡайтам әле» (Хәния Фәрхи), «Ҡызыл розалар» (Айҙар Ғәлимов), «Бәхет ҡошо» (Фәдис Ғәниев һәм Лилиә Биктимерова), «Урам» (Ғәбделфәт Сафин), «Тыуған яҡ» (Вәсилә Фәттахова) «Ағиҙел ҡыҙы» (Илмир Ғәзизуллин) һәм башҡа йырҙарҙың һәр береһе хитҡа әйләнгән.

«Башҡортостандың мәҙәни донъяһы» порталы