Иҙел буйы театрҙарының “Ниточка” төбәк-ара фестивале барышында биш көн дауамында тамашасылар ҡурсаҡтар дөньяһында гиҙҙе. Башҡорт дәүләт ҡурсаҡ һәм Милли йәштәр театрҙары сәхнәләрендә үткән фестиваль афишаһында бөтәһе 14 спектакль ине. “Три поросенка”, “Гуси-лебеди”, “Гадкий утенок” кеүек традицион әкиәттәр менән бер рәттән, эксперимент булараҡ “Медея”, “Бәләкәй трагедиялар” һ.б. спектаклдәр күрһәтелде. Репертуарҙа балалар ғына түгел, ололар өсөн дә ҡызыҡлы тамашалар бар ине.

Фестивалде Ырымбур дәүләт өлкә ҡурсаҡ театры тамамланы. Тамашасылар өсөн А. С. Пушкиндың “Бәләкәй трагедиялар” циклынан өс әҫәрҙең сәхнә версияһы тәҡдим ителде. Фестивалде ябыу тантанаһында еңеүселәр билдәләнде, номинацияләр буйынса бүләктәр тапшырылды. 

Быйылғы сараның хуҗалары — Башҡорт дәүләт ҡурсак театры балалар өсөн ҡуйылған “Звездочка” космик әкиәте өсөн “Вечерняя Уфа” редакцияһы призына лайыҡ булды.

Тәнҡитселәр коллегияһы — Мәскәүҙән Валентина Федорова, Өфөнән Динә Дәүләтшина, Санкт-Петербургтан Анна Константинова, Ҡазандан Нияз Игламов фестивалдә ҡатнашҡан тамашаларҙы профессиональ яҡтан баһалап, театр эшмәкәрҙәре һәм тәнҡитселәр коллегияһы дипломы менән “Варвара Ивановна” спектакле өсөн Ырымбурҙың “Пьеро” ҡурсаҡ театрын бүләкләне. 

“Ниточка” төбәк-ара фестиваленең төп еңеүсеһен Өфө ҡалаһының төрлө мәктәптәре уҡыусыларынан ойошҡан балалар жюриһы билдәләне. Ул Пенза өлкәһенең “Кукольный дом” театрына кубок бүләк итте. Әйтергә кәрәк, шул уҡ театр артистары “Тамыр” телеканалы дипломы менән дә бүләкләнде.

— Быйылғы фестивалдең Өфөлә үткәрелеүенә беҙ бик шатбыҙ, — тине Башҡорт дәүләт ҡурсаҡ театры директоры Илмар Әлмөхәмәтов. — Ҡатнашыусыларҙы балалар жюриһы һәм тәҗрибәле тәнҡитселәр баһалауы менән был фестиваль бик үҙенсәлекле булды.

Фестиваль тамам. Ә 2014 йылда фестиваль Пенза ҡалаһында йәнә ишектәрен асасаҡ.