29 март М.Ғафури исемендәге Башҡорт дәүләт академия драма театры сәхнәһендә Рәсәйҙең, Башҡортостандың һәм Татарстандың халыҡ артисы, С.Юлаев исемендәге Дәүләт премияһы лауреаты Нурия Ирсаеваның юбилей бенефисы үтәсәк.

Тәбиғәт актрисанан талантты, матурлыҡты, һөйкөмлөлөктө һис йәлләмәгән, ул һынландырған образдар меңәрләгән тамашасының күңелендә һаҡлана. Ниндәй характерлы ғына ролдәр булмаһын, Нурия Исхаҡ ҡыҙы еренә еткереп уйнай, образды тулыһынса асырға тырыша. Актрисаның сәхнәгә хеҙмәт итеүенә 50 йылға яҡын, ошо йылдар эсендә Нурия Ирсаева 100 яҡын ролдәрҙә уйнаған, әйтергә кәрәк, уларҙың күбеһе төп ролдәр.

«29 март үтәсәк был кисә бик матур булмаҡсы, сөнки унда минең иң яҡын кешеләрем, коллегаларым һәм әлбиттә яратҡан тамашасым буласаҡ», – ти халыҡ артисткаһы.

Юбилей бенефисы 2 бүлектән торасаҡ: 1 бүлектә тамашасы Т.Миңнуллиндың «Хушығыҙ!» лироко-романтик драмаһын күрәсәк, 2 бүлектә Нурия Ирсаева уйнаған спектаклдәрҙән монологтар яңғыраясаҡ.