Оло юғалтыу...
Башҡортостан әҙәбиәте оло юғалтыу кисерҙе. 74-се йәшендә билдәле шағир, тәржемәсе һәм журналист Сафуан Әлибай арабыҙҙан китте.
Сафуан Әфтәх улы 1941 йылдың 21 февралендә Салауат районы Тирмән ауылында тыуған. Башҡорт дәүләт университетын тамамлай. Төрлө йылдарҙа «Башҡортостан пионеры», «Ағиҙел» журналдары редакцияларында, Әхмәтзәки Вәлиди исемендәге Милли китапханала директор булып хеҙмәт итә.
Тәүге шиғырҙар китабы 1968 йылда донъя күрә. «Яҡты ҡояш – беҙҙең юлдашыбыҙ» йыйынтығы балаларға арнала.
Сафуан Әлибай тәржемәсе булараҡ та билдәлелек яулай. Ул Александ Пушкин, Рәсүл Ғамзатов, Даваид Кугультинов кеүек бөйөк әҙиптәрҙең әҫәрҙәрен башҡорт теленә тәржемә итә.
Шағирҙың үҙенең шиғырҙары рус, ҡаҙаҡ, монгол, төркмән, украин, немец телдәрендә донъя күрә.
1996 йылда «Тылсымлы шар» (1994) китабы өсөн Сафуан Әлибаев ЮНЕСКО-ның Ганс Христиан Андерсен исемендәге Маҡтаулы дипломына лайыҡ булды.
Шағирҙың шиғырҙарына композиторҙар Заһир Исмәғилев, Роберт Ғәзизов, Роза Сәхәүетдинова, Данил Хәсәншин, Рим Хәсәновтар тарафынан йырҙар ижад ителгән.
Сафуан Әлибаев Ғ.Сәләм исемендәге республика йәштәр премияһы , С.Юлаев ордены лауреаты, БАССР-ҙың атҡаҙанған сәнғәт эшмәкәре.
Мәрхүм менән хушлашыу 7 июль 10.00 сәғәттә Х.Әхмәтов исемендәге Башҡорт дәүләт филармонияһында үтә.
