Иҫке Собханғол ауылындағы балалар сәнғәт мәктәбе гел генә шау-гөр килеп тора. Музыка, бейеү, рәсем төшөрөү һәм башҡа һөнәрҙәргә өйрәтәләр бында. Сәнғәт мәктәбенең “Осҡон” өлгөлө балалар ансамбле айырыуса уңышлы эшләй. Районда ғына түгел, республикала ла беләләр уны. Төрлө халыҡ бейеүҙәрен оҫта башҡарған ҡыҙҙар һәм малайҙар төбәктәге һәр төрлө конкурста ихлас ҡатнаша, призлы урындар яулай. Әйтәйек, Ейәнсура районында үткән төбәк-ара бәйгелә малайҙар, “Йәш мортазинсылар” бейеүен башҡарып, I дәрәжә дипломға лайыҡ булды. Ансамблдә шөғөлләнеүселәр “Байыҡ” республика балалар конкурсынан да ҡалмай, быйыл да көс һынашырға ниәттәре бар.