Донъя майҙанында башҡорт халҡының, уның мәҙәниәтенең һәм теленең урынын билдәләүҙә видео эштәрҙе ҡулланыу яҡшы ысул булыр ине. Милли проблемаларҙы видео эштәр аша күтәреүҙе, башҡорт телендәге видеоларҙы арттырыуҙы, сифатлы видео төшөрөүҙе хуплағандар интернет киңлектәрендә башланған “Осҡон”, тип аталған башҡорт видеолары бәйгеһенә ҡушыла ала. Бәйгене Силәбе өлкәһе һәм БР Мәскәүҙәге, Санкт-Петербург ҡалаларындағы Башҡорт йәштәре берлеге ойоштора. Бөгөнгө көнгә оргкомитетҡа төрлө тарафтарҙан, ҡала-ауылдарҙа йәшәүселәрҙән 20 ашыу видео килгән. Улар араһында профессионал авторҙарҙың да, күңел ҡушыуы буйынса төшөрөп ебәргәндәрҙекеләр ҙә бар. Видеолар төрлө номинацияларҙа ҡабул ителә: мобиль видео, музыкаль клип, йәмғиәт проблемаларына иғтибар йүнәлткән видео, ҡыҫҡа метражлы фильм. Уларҙы бәйгенең махсус битенә, йә иһә, “Бәйләнештә.ру” сайтына YouTube һәм Vimeo видеохостингтары аша ебәреү мотлаҡ. Ыңғай тулҡындағы, рух һәм тән сәләмәтлегенә баҫым яһаған, яҡты хистәр уятыусы видео эштәрҙең еңеүгә барып етеүҙә мөмкинлектәре күберәк. Бәйгенең бүләкләү фонды 50 мең һум тәшкил итә. Ғаризалар һәм видеолар 2015 йылдың 30 ноябренә тиклем ҡабул ителә.