Ломоносов исемендәге Мәскәү дәүләт университеты киң мәғлүмәт саралары өсөн «Панацея» тип исемләнгән Бөтә Рәсәй конкурсы ойошторҙо. Башҡортостан вәкилдәре лә ҡатнашҡан сарала «Тамыр» балалар телеканалы режиссеры Гөлназ Ғәлимуллина фестивалдең ике номинацияһында еңеүсе тип табылды.

Гөлназ Ғәлимуллина телевидениела 9 йыл эшләй. Ошо ваҡыт эсендә ул үҙен бик күп фильмдар авторы итеп таныта. Режиссерҙың «Профиль» циклынан «Ғүмер тамсыһы» тип исемләнгән эше Һаулыҡ һаҡлау һәм социаль үҫеш министрлығы тарафынан юғары баһаланһа, «Йәшәүгә ваҡыт» фильмы Хөкүмәттең Маҡтау ҡағыҙы менән билдәләнә.

Әлеге фестивалдә «Реаниматолог» фильмы «Аҡ халат», ә «Ғүмер тамсыһы» - «Ауыр хәлдәге кешеләр» номинацияһына лайыҡ була. Ике фильмда ла йәштәрҙең үлем менән йәшәү араһындағы көрәше һүрәтләнә. Бигерәк тә һуңғы фильмда 16 йәшлек ҡыҙҙың лейкоз сиренән яфаланыуы берәүҙе лә битараф ҡалдырмай.

Гөлназ Ғәлимуллинаның документаль фильмдары фестивалдә юғары баһалана. Һөҙөмтәлә автор ике меңдән ашыу ҡатнашыусы араһында лайыҡлы урын яулай. Бынан тыш, автор киләһе йылға «Панацея» Бөтә Рәсәй фестиваленә баһалама ағзаһы итеп тә саҡырыла.

Сығанаҡ: Башҡортостан юлдаш телевидениеһы