З.Биишева исемендәге «Китап» нәшриәтендә «Парижды ла күрҙек беҙ…» тип исемләнгән фотоһүрәттәр йыйынтығы баҫылды. 2 мең тираж менән баҫылған альбомда башҡорт яугирҙарының Ватан һуғышында ҡатнашыуы, ҡаһарманлыҡтары тураһында тарихи документаль фотоһүрәттәр һәм башҡа ҡыҙыҡлы материалдар урын алған. «Китап» нәшриәтенең баш мөхәррире Зөлфиә Ҡарабаева әйтеүенсә, баҫманың күп данаһы район-ҡалалар китапханаларына бушлай оҙатылған, уны шулай уҡ нәшриәттең Өфөләге кибетендә лә һатып алырға мөмкин. Ҡыҙыҡһыныусылар күбәйеп, фотоальбомға ихтыяж тыуған осраҡта, уны йәнә нәшер итеү мөмкинлеге бар.