Пермь ҡалаһының халыҡ ижады йортонда 1812 йылғы Ватан һуғышындағы еңеүҙең 200 йыллығына арналған “Төньяҡ амурҙары” мәҙәни-мәғлүмәти акцияһы үтте. Программаға ярашлы “Башҡорттарҙың тарихи риүәйәттәре” темаһына “түңәрәк өҫтәл” ойошторолдо. Башҡортостан һәм Пермь крайы ғалимдары, йәмәғәт эшмәкәрҙәре ҡаһарман ата-бабаларыбыҙҙың данлы яу юлын байҡау менән генә сикләнмәне, бөгөн халҡыбыҙҙы борсоған проблемаларға ла туҡталды. 

Шулай уҡ сараға килеүселәр гәйнә башҡорттарының милли аш-һыуҙары, ҡул эштәре, йыр-моңдары, ижади коллективтарҙың сығышы менән дә танышты. 

Пермь крайының бер ни тиклем өлөшө башҡорттарҙың аҫаба ере иҫәпләнә. Унда бөгөн 15 меңгә яҡын милләттәшебеҙ йәшәй. Илдә төрлө реформа үткәрелеп, ерҙәребеҙ төрлөсә бүлгеләнһә лә, ҡан-ҡәрҙәштәребеҙ менән рухи бәйләнештәр өҙөлмәй. 

Бынан өс йыл элек Башҡортостанда Пермь крайы башҡорттарының мәҙәниәте көндәре уҙғарылды. Ул сарала 400-гә яҡын кеше ҡатнашҡайны.