«ПониМашка» Рәсәй аҙналыҡ балалар журналы башҡорт әкиәттәрен нәшер итә.
Бай мәҙәни мираҫҡа эйә башҡорт халҡының ауыҙ-тел ижадында әкиәттәр иң ҙур бүлекте тәшкил итә. Әкиәттәр халҡыбыҙҙың тәрбиә нигеҙе.
Ошо арала «Открытые системы» нәшриәте һәм «ПониМашка» аҙналыҡ балалар журналы Рәсәйҙә йәшәүсе халыҡтарҙың ауыҙ-тел ижадына арналған, «Рәсәй халыҡтары әкиәттәре», тип аталған проект башлауы хаҡында билдәле булды.
Проект «ПониМашка» аҙналыҡ балалар журналының бер һанын Рәсәйҙең төрлө төбәктәрендә йәшәүсе халыҡтарҙың эпосына бағышлауҙы күҙ уңында тота.
Был ҡыҙыҡлы проекттың маҡсаты — балаларҙы илебеҙҙә көн итеүсе төрлө халыҡтарҙың ижадының иң яҡшы өлгөләре менән таныштырыу, башҡа халыҡтарға һәм уларҙың ижадына ҡарата ҡыҙыҡһыныу арттырыу.
Әле «ПониМашка һәм ҡанатлы ат. Башҡорт халыҡ әкиәттәре», тип исемләнгән тематик һан киң ҡатламға һатыуға сығарылған да инде.
Проекттың башҡорт халыҡ ауыҙ-тел ижадын, балалар тәрбиәһендә файҙалы алымдарҙы яҡтыртҡан һанын әҙерләшеүгә РФ БР-ның тулы хоҡуҡлы вәкиллеге, Башҡортостандың Матбуғат һәм киң мәғлүмәт саралары агентлығы, шулай уҡ, «Аҡбуҙат» балалар журналы редакцияһы булышлыҡ иткән.
Һанда кескәйҙәр мауыҡтырғыс башҡорт халыҡ әкиәттәре менән таныша, әкиәттәге Аҡбуҙат менән бергә башҡорт халҡының мәҙәниәтен өйрәнә ала. Тағы ла, унда кескәйҙәр өсөн үҙенсәлекле  хикәйәләр, мәҡәлдәр, иғтибар һәм фекерләү ҡеүәһен арттырыусы йомаҡтар, уйындар урын алған.