Чехияның баш ҡалаһында халыҡ-ара конкурстар лауреаттары Өфөнән Фларида Иркина һәм Динә Хөсәенова сығыш яһаны. Улар операларҙан ариялар менән бер рәттән, башҡорт-татар композиторҙарының әҫәрҙәрен дә башҡарҙы. Фларида ла, Динә лә милли романстарның киләсәге бар, тип үҙ фекерҙәрен еткерә.

Фларида – Х. Әхмәтов исемендәге Башҡорт дәүләт филармонияһы солисы, халыҡ-ара йыр бәйгеләре лауреаты, ә Динә З. Исмәғилев исемендәге Өфө сәнғәт академияһында дүртенсе курста уҡый. Шулай уҡ төрлө бәйгеләрҙә бүләктәр алған ул. Узған йыл декабрь уртаһында Рәсәйҙең Тверь ҡалаһында СССР-ҙың халыҡ артисы А. П. Иванов исемендәге халыҡ-ара йыр бәйгеһендә Фларида ла, Динә лә лауреат исеменә лайыҡ була. БДБ илдәренән һәм Рәсәйҙең барлыҡ төбәктәренән барлығы 200-ләп йырсы был сарала ҡатнашырға теләк белдергән, бары тик 42-һе генә бәйге сәхнәһенә үтә алған. Прага халыҡ-ара консерваторияһы профессоры Таһирә Минаҗетдинова Тверҙә жюри төркөмөндә була һәм лауреаттарҙы Чехияның баш ҡалаһына махсус концертҡа саҡыра.

Ҡыҙҙар 21 июнь көндө үткән йыр кисәһендә донъя кимәлендә билдәле операларҙан ариялар менән бер рәттән, татар-башҡорт романстарын да башҡарҙы. Уларҙың һәр сығышы көслө алҡыштарға күмелде.

Фларида Прагала башҡорт халыҡ йыры «Таштуғайҙы», Мансур Мозафаровтың «Һайра, һандуғас», Александр Ключаревтың «Иртәнге йыр» һәм Рөстәм Яхиндың «Китмә, һандуғас» әҫәрҙәрен башҡара. «Таштуғайҙы», «Китмә, һандуғас»ты башҡортса йырлай ул. 

Динә Хөсәенова Прага тамашасыһына Заһир Исмәғилевтың «Яҙ һәм гөлдәр», Рөстәм Яхиндың «Һинең өсөн» романстарын тәҡдим итә.

«Башҡорстандың мәҙәни донъяһы» порталы