93-сө ижад миҙгелен ябыу көнөндә, йәғни 14 июнь академтеатр үҙ тамашасыһына өр-яңы спектакль тәҡдим итәсәк! Башҡортостандың халыҡ яҙыусыһы Талха Ғиниәтуллиндың әҫәрҙәре, Рәлиф Кинйәбаев инсценировкаһы буйынса ҡуйылған «Ер менән күк араһында» спектаклендә Ильяс исемле һалдат хаҡында һүҙ бара. Уның алдында үлем менән йәшәү тартҡылашҡан саҡта, янына егеттең ғүмерен алыу өсөн Ғазраил килә. Һәм ул йәш кешегә, әгәр ул тере ҡалһа, киләсәктә ниҙәр көтөүен ентекле рәүештә һүрәтләп бирә. Һыҙланыуҙар, ауыртыныуҙар, ярлылыҡ, түбәнһетеүҙәр – алдағы тормоштоң ниндәй булырын аңлағас, һалдат үҙ ҡарарын яһай.

Жанр йәһәтенән спектакль өндәге күрәҙәлек тип билдәләнгән. Ҡуйыусы-рәссам – Альберт Нестеров, композитор – Илшат Яхин, хореограф – Сулпан Асҡарова.