Хөсәйен Әхмәтов исемендәге Башҡорт дәүләт филармонияһында журналист, яҙыусы, Шәһит Хоҙайбирҙин исемендәге премия лауреаты Рәсүл Сәғитовтың ижад кисәһе үтте.

Тамаша танылған журналистың туғандарын, хеҙмәттәштәрен, күренекле йәмәғәт эшмәкәрҙәрен, ижад һөйөүселәрҙе бергә йыйҙы. Әйткәндәй, ҡәләм оҫтаһының 50 йәшлек юбилейы айҡанлы үткән кисәнең «Имен-аман торайыҡ» тип аталыуы осраҡлы түгел. Байрам хужаһы өсөн был һүҙҙәр тәрән мәғәнәгә эйә. Беренсенән авторҙың яңы китабы ошо исем аҫтында сыҡһа, икенсенән, Рәсүл Сәғитов тапшырыуҙарында тамашасыларға гел шулай тип өндәшә, именлек теләй. Ижад кисәһендә юбилярға бик күп ҡотлау һүҙҙәре әйтелде, йыр-моң менән үрелеп барған байрамды журналистың хеҙмәттәштәре, ижадташ дуҫтары бай сығышы менән биҙәне.