15 ғинуарҙа Х.Әхмәтов исемендәге Башҡорт дәүләт филармонияһының Орган залында Флүрә Килдейәрованың сираттағы концерты уҙасаҡ. Рәсәйҙең һәм Башҡортостандың халыҡ артисы, Салауат Юлаев исемендәге Дәүләт премияһы лауреаты Флүрә Килдейәрова Башҡортостан Республикаһының иң сағыу йырсыларының береһе. Уның исеме республикала ғына түгел, унан ситтә лә яҡшы таныш. Флүрә Әхмәтша ҡыҙы көслө вокал һәләтенә, оҫта башҡарыу техникаһына эйә. Флүрә Килдейәрованың репертуарында – рус, сит ил, башҡорт һәм татар композиторҙарының вокал әҫәрҙәре, башҡорт халыҡ йырҙары урын алған. Уның йырсы булараҡ оҫталыҡ кимәле, башҡорт халыҡ йырҙарының классик өлгөһө булған оҙон көйҙө башҡарыуында күренә. Халыҡ йырҙарын башҡарып йырсы бөтә Еропаны – Германия, Бельгия, Голландия, Венгрия, Румыния, Польша, Италия, Франция буйлап – йөрөп сыға. Фольклор программаһы менән Ҡытайҙа, Төркиәлә, Копенгагенда сығыш яһай. Германияла Дрезденда, Лейпцигта, Һаллела була. 15 ғинуарҙа уҙасаҡ «Флүрә Килдейәровала ҡунаҡта» исемле өр-яңы программала йырсының ижадташ дуҫтары Индира Әсәҙуллина (фортепиано), Владимир Семин (флейта), Владимир Бакулин (альт), Ильшат Ишмуратов (курай) ҡатнаша.
 Башлана 18-00 сәғәттә
 Концертҡа рәхим итегеҙ!  «Башҡортостандың мәҙәни донъяһы» порталы