Осрашыуға күңелле ваҡиғалар сәбәпсе булды: Рауил Төхвәт улы «Оноторлоҡ булдымы ни?..» тигән яңы китабы менән таныштырҙы һәм Америка Ҡушма Штаттарына барып ҡайтыуы тураһында һөйләне.

- 2014 йылдың июнь айында ике аҙнаға яҡын Америкала булырға тура килде. Сәфәрҙең маҡсаты – унда уҡыған ейәнемде күреү, шулай уҡ сит ил менән яҡындан танышыу ине. Дөрөҫөн әйткәндә, Америка минең күңелемә ул хәтлем ятманы. Күп ҡатлы биналар, ҙур-ҙур йорттар, ундағы ҡайнаҡ минең өсөн ятыраҡ булды. Индеецтар резервацияһына сәйәхәт күңелдә ауыр тойғолар ҡалдырҙы, милләттең шунда йәшәргә мәжбүр булыуы аптыратты. Шул сәфәрҙән һуң «Резервация» шиғыры тыуҙы.

Ижади осрашыуҙа Ҡәҙим Аралбаев, Рәшит Шәкүр, Гөлфиә Юнысова, Ринат Камал, Мөнир Ҡунафин, БДУ һәм Аҡмулла исемендәге БДПУ уҡытыусылары һәм студенттары ҡатнашты. Рауил Бикбаев тамашасыны өр-яңы шиғырҙары менән ҡыуандырҙы.