Өфөнөң «Нефтсе» мәҙәниәт һарайында Башҡортостан Республикаһы халыҡтарының милли мәҙәниәттәре республика телевизион фестиваль-марафонының гала-концерты үтте.
Мәҙәниәт министры урынбаҫары Рәнис Рәйес улы Алтынбаев әйтеүенсә, Милли мәҙәниәттәр фестиваль-марафоны – Башҡортостанда Милләт-ара татыулыҡты нығытыу йылына арналған ҙур мәҙәни проект һәм республика мәҙәни тормошонда яңы күренеш, сөнки әлеге көнгә тиклем, бындай ҙур сара, тап ошондай фестиваль-марафон үткәне булманы.
Был үҙенсәлекле сараны ҡарағандан һуң Мәҙәни проекттар үҙәге ойошторолоу бик ваҡытлы булыр ине тигән фекер тыуа. Иҫегеҙгә төшөрәбеҙ, фестиваль-марафон октябрҙә старт алып, бер ай дауамында республиканың барлыҡ тиерлек район һәм ҡалаларын йәлеп иткәйне. Гала-концертҡа республиканың төрлө район-ҡалаларынан Өфөгә иң яҡшы солистар һәм коллективтар – фестивалдең зона программаларында ҡатнашыусылар саҡырылды. «Башҡортостандың мәҙәни донъяһы» порталы