Яҡын арала республикала ҡыҙыҡлы проект – Йәштәр симфоник оркестры төҙөләсәк. Коллектив З.Исмәғилев исемендәге Өфө дәүләт академияһы базаһында асыласаҡ. Идея БР мәҙәниәт министры Ә.И. Шафиҡованыҡы. Оркестр составына сәнғәт академияһының, училищеһының, урта махсус музыкаль коллежденың иң яҡшы музыканттары керәсәк. Был Өфө өсөн бик кәрәкле, сөнки ундай оркестрҙар сит илдәрҙә, Рәсәйҙең ҡайһы бер ҡалаларында уңышлы эшләй һәм ул күптән донъя практикаһында ҡулланыла. Яңы коллективты халыҡ-ара конкурстар лауреаты, БР Милли симфоник оркестрының баш дирижеры һәм художество етәксеһе Рөстәм Сөләймәнов етәкләйәсәк.
Музыканттар Йәштәр оркестрында ҡанат нығытып, һуңынан Милли симфоник оркестрының төп көстәренә әйләнеп китерҙәр, тип ышанғы килә.
Әле оркестр ҡыҙыу репетиция осоро кисерә. Презентация Ф.Шаляпин исемендәге концерт залында март айына планлаштырыла. Концерт программаһында джаз, рок-опера һәм мюзиклдарҙан ариялар яңғыраясаҡ, шулай уҡ талантлы вокалистарҙың сығыштары көтөлә.
Оркестр – республиканың мәҙәни тормошона яңы һулыш индерәсәк. Автор: Ләйлә Ишморатова
«Башҡортостандың мәҙәни донъяһы» порталы