Әкиәт – ул халыҡтың уй-хыял емеше. Шуныһы мөһим: ул һәр саҡ изгелектең тантана итеүе, геройҙың еңеүе менән тамамлана.

Әкиәт геройы – халыҡтың яҡты һәм ҡанатлы хыялдарын үҙендә кәүҙәләндергән ыңғай персонаж. Тап бына ошо яғы менән әкиәт ҙур тәрбиәүи көскә эйә. Халыҡ ижадының ошо жанры буйынса бына 3 йыл инде республикала «Һаумы, һаумы, әкиәт!» тип исемләнгән конкурс ҙур ойошҡанлыҡ менән үтә. Уның маҡсаты – талантлы балаларҙы асыҡлау, башҡорт телен, ғөрөф-ғәҙәтен һаҡлау, әкиәтселәр, сәсәндәр мәктәбен үҫтереү һәм тергеҙеү, үҫеп килеүсе йәш быуында тарихи һәм мәҙәни мираҫҡа һаҡсыл ҡараш тәрбиәләү.

Бәйге шарттары буйынса, ҡатнашыусы халыҡ әкиәтен һөйләргә тейеш. Икенсе бер үҙенсәлеге - быйыл бәйге төбәк-ара кимәлдә үтәсәк. Конкурста 7 йәштән 14 йәшкә тиклемге балалар ҡатнаша. 1 - 4 һәм 5-7 класс уҡыусылары айырым һынау тота. Уҙған йылдарҙа еңеү яулаусылар бәйгелә ҡатнаша алмай. Конкурс һәм лайыҡлыларҙы тәбрикләү тантанаһы 14 апрелдә Конгресс-холда үтәсәк.

«Башҡортостандың мәҙәни донъяһы» порталы