Өфөнөң «Нефтсе» мәҙәниәт һарайында виртуоз ҡурайсы, Рәсәй һәм Халыҡ-ара конкурстар лауреаты Роберт Юлдашевтың һәм уның етәкселегендәге «Ҡурайсы» төркөмөнөң концерты үтәсәк.  
Башҡорт ҡурайын донъя кимәленә алып сығып, Миландың «Ла Скала» сәхнәһен шаулатҡан Роберт Юлдашев өсөн ҡурай - ул йәшәү рәүеше. Милли музыка ҡоралына булған һөйөүе уны «Ҡурайсы» ансамблен төҙөргә этәргес бирә. Йәш йырсы Зилиә Бәхтиеваның төркөмдә шөғөлләнеүенә бер йыл. Коллектив, һөнәрем - тормошомдоң яҡты биҙәге, ти ул.
Юғары сәнғәттең милләте юҡ. Роберт Юлдашев башҡарыуында башҡорт ҡурайының ҡабатланмаҫ үҙенсәлегенә хайран ҡалған Рәсәй йондоҙҙары Гарик Сукачев, Николай Носков, Пелагея, Анита Цой кеүек йырсылар виртуоз ҡурайсы менән ижади хеҙмәттәшлек итеп, үҙҙәре өсөн ҙур асыш яһай.
«Ҡурайсы» төркөмөнөң саунд продюсеры Азамат Йәғәфәров көйҙәргә төрлө стилдә яңғырарға ярҙам итә. Шулай уҡ коллектив Азамат Аҙнағолов, Урал Иҙелбаев кеүек композиторҙар менән дә тығыҙ бәйләнештә ижад итә. Сәхнәлә - «Торна» риүәйәте. Күптән түгел «Рәсәй Культура» телеканалында «Ҡурайсы»ларға Рәсәйҙең билдәле профессиональ халыҡ коллективтарының фольклор фестивалендә ҡатнашырға тура килә. Сарала төркөм башҡорт иленең мәҙәниәтен, данын юғары кимәлдә күрһәтеүгә ирешә. Ҡурайға илдең төрлө төбәктәренән йыйылған төрлө милләт халҡы аяғүрә баҫып алҡышлай.

Сығанаҡ: Башҡортостан юлдаш телевидениеһы