2013 йылдың 11 мартында БР Президенты Р.З.Хәмитов билдәле ҡубыҙсы Р.А.Заһретдиновты сәнғәт һәм мәҙәниәт өлкәһендә ҙур ҡаҙаныштары өсөн С.Юлаев ордены менән бүләкләү хаҡындағы указға ҡул ҡуйҙы.

РФ-ның һәм БР-ҙың атҡаҙанған мәҙәниәт хеҙмәткәре, С.Юлаев исемендәге Дәүләт премияһы лауреаты Роберт Абдрахман улы 2012 йылдың 16 декабрендә 80 йәшен билдәләне. Уның репертуарында ҡубыҙ өсөн эшкәртелгән 200 яҡын башҡорт, рус, сит ил әҫәрҙәре. Роберт Заһретдинов ҡубыҙҙа уйнарға өйрәнеү серҙәрен асҡан дәреслек авторы ла.

13 март «Нефтселәр» мәҙәниәт һарайында музыкант юбилей кисәһен үткәрә. Ижади байрамда республиканың билдәле артистары ла ҡатнашасаҡ.

Ә инде 14–15 март Мәсетле районында үтәсәк Төбәк-ара ҡубыҙсылар һәм өзләүселәр конкурсында Р.Заһретдинов жюри рәйесе буласаҡ.

Сығанаҡ: БР Мәҙәниәт министрлығы