Өфөлә билдәле ҡубыҙсы Роберт Заһретдиновтың 80 йәше хөрмәтенә «Нефтселәр» мәҙәниәт һарайында байрам концерты уҙҙы. Роберт Абдрахман улын ҡотларға дуҫтары, коллегалары һәм уның ижадын ихтирам иткән тамашасы килде.

Музыкант 80 йәшендә лә йәшлек дәртен ташламай, үҙ тамашасыһын ҡубыҙҙан ағылған сихри тәбиғәт моңдары менән ҡыуандырыуын дауам итә. Ысынлап та, ябай ғына музыка ҡоралы уның ҡулында моң сығанағына әүрелде. Ҡубыҙҙы камиллаштырыу өҫтөндә лә Роберт Абдрахман улы актив эшләй. Музыканттың репертуарында ҡубыҙ өсөн эшкәртелгән 200 яҡын башҡорт, рус, сит ил әҫәрҙәре. Роберт Заһретдинов ҡубыҙҙа уйнарға өйрәнеү серҙәрен асҡан дәреслек авторы ла.

2013 йылдың 11 мартында БР Президенты Р.З.Хәмитов билдәле ҡубыҙсыны сәнғәт һәм мәҙәниәт өлкәһендә ҙур ҡаҙаныштары өсөн С.Юлаев ордены менән бүләкләү хаҡындағы указға ҡул ҡуйҙы.

Роберт Заһретдиновҡа һаулыҡ һәм ижади уңыштар теләйек!

«Башҡортостандың мәҙәни донъяһы» порталы