30 мартта, Башҡортостан «Китап» нәшриәтенең магазинында Башҡортостандың халыҡ шағиры, Салауат Юлаев исемендәге Дәүләт премияһы лауреатының тыуыуына 80 йыл тулыу уңайынан сыҡҡан «Рәми Ғарипов. Тормошо һәм ижады» фотоальбомының исем туйы үтте.

Сарала шағирҙың ижадына ғашиҡтар, Рәми Ғариповтың улы Азамат Ғарипов, «Китап» нәшриәтенең директоры Зөфәр Мөхтәр улы Тимербулатов, шағирҙар Хәсән Назар, Ирек Кинйәбулатов, «Шоңҡар» журналының һәм «Киске Өфө» гәзитенең баш мөхәррирҙәре Азамат Юлдашбаев һәм Гөлфиә Янбаева, «Йәншишмә» гәзитенең бүлек мөхәррире Зөһрә Ҡотлогилдина, БДУ профессоры Тимерғәле Килмөхәмәтов һәм башҡорт баҫмаларының баш мөхәррирҙәре ҡатнашты.

Бөхтә генә итеп ойошторолған исем туйын алып барыусы Ирек ағай Кинйәбулатов әлеге сараға саҡырыуҙар таратып халыҡтың күпләп йәлеп ителмәүен билдәләп үтте, сөнки, ысынлап та, нәшриәттең фирма магазины залы килеүселәрҙе һыйҙырмаҫ ине.

«Рәми Ғарипов. Тормошо һәм ижады» альбомының исем туйына күптән түгел «Минең Рәми!» конкурсында башҡорт телендә шиғыр һөйләп халыҡты хайран ҡалдырған Линдси Пигейҙың килеүе лә сараға йәм өҫтәне.

 Сығанаҡ: «Шоңҡар» журналы