Буласаҡ йырсы Саҡмағош районы Иҫке Ҡалмаш ауылында тыуып үҫә. Мәктәпте тамамлағас, ижад юлын филармонияла БР-ҙың академик хор капеллаһында башлай. Унда ун йыл солист була. Шамил Хәмәҙинуров етәкселегендәге “Ихлас” төркөмө составында ла күп йылдар сығыш яһай Рәмил Хәзиев. Уның репертуарында тыуған яҡҡа, ата йортона, ата-әсәйгә мөхәббәт менән һуғарылған йырҙар урын алған. Йырсы лирик йырҙарға өҫтөнлөк бирә. Рәмил Хәзиев башҡарыуындағы тәрән мәғәнәле, хисле йырҙар ваҡытҡа буйһонмай, олоһоноң да, кесеһенең дә күңеленә яҡын.

Композитор булараҡ Рәмил Хәзиевтың утыҙ йыры донъя күрҙе. Уның Ә. Кәшфуллин, Р. Ҡотлоев, А.Игебаев, Р. Вәлиева кеүек шағирҙарҙың һүҙҙәренә ижад ителгән йырҙарын Башҡортостан һәм Татарстандың танылған сәхнә оҫталары яратып башҡара. Айырыуса “Һыу юлдары гөл генә” (Ә. Кәшфуллин), “Ҡыштың аҡ сәскәләре” (И. Низаев), “Һағыныу” (Д. Булатова) кеүек ижад емештәре халыҡ йөрәгенә үтеп инде.

Концертҡа рәхим итегеҙ, дуҫтар!