5 мартта, Ә.Вәлиди исемендәге Милли китапханала күренекле шағир һәм ғалим, публицист, филология фәндәре докторы, билдәле йәмәғәт эшмәкәре Рәшит Шәкүрҙең 75 йәшлек юбилейына арналған кисә үтте. 

Рәшит Зәки улы — 1937 йылдың 11 ғинуарында Әлшәй (хәҙерге Стәрлетамаҡ районы) районы Яңы Абдрахман (Түбәнге Сумар) ауылында тыуған. Ауылда ете йыллыҡ мәктәпте тамамлағас нефть техникумында уҡый, промыслылы оператор булып эшләй, армияла хеҙмәт итә. 1965 йылда Башҡорт дәүләт университетын тамамлағандан һуң СССР Фәндәр академияһының Тел ғилеме институтында аспирантурала уҡый һәм 1974 йылда кандидатлыҡ диссертацияһын яҡлай, һуңынан докторлыҡ диссертацияһын яҡлай. 

Рәшит Шәкүр — 180 ғилми хеҙмәт, тиҫтәгә яҡын китап авторы. Уның ғилми хеҙмәттәре Башҡортостан топономикаһын өйрәнеүгә бағышланған. 

Кисәлә шағирҙың яҡындары, дуҫ-иштәре, ҡәләмдәштәре, билдәле яҙыусылар һәм шағирҙар, уҡыусылар ҡатнашты. Рәшит Зәки улын юбилейы менән Ә.Вәлиди исемендәге Милли китапхана директоры Ә. Ә. Ибраһимов, Башҡортостан Яҙыусылар ойошмаһы етәксеһе вазифаһын ваҡытлыса алып барған, БР халыҡ шағиры Ҡәҙим Аралбай, БР халыҡ яҙыусыһы Ноғман Мусин, медицина фәндәре докторы М. Аҙнабаев, яҙыусы М. Бураҡаева һ.б. ҡотланы.