Әхмәтзәки Вәлиди исемендәге Милли китапхананың Октябрь революцияһы (10) урамында урынлашҡан филиалында билдәле рәссам Салауат Ғиләжетдиновтың шәхси күргәҙмәһе эшләй. 

Салауат Мөхәмәт улы Ғиләжетдинов сығышы менән Борай районының Борай ауылынан. Өфө дәүләт сәнғәт институтын тамамлаған. 1998 йылдан Рәсәй Рәссамдар Союзы ағзаһы. Салауат Ғиләжетдинов байтаҡ республика, төбәк-ара, Бөтә Рәсәй һәм халыҡ-ара күргәҙмәләрҙә ҡатнашҡан. Уның эштәре менән Михаил Нестеров исемендәге Башҡорт дәүләт художество музейында, Новосибирск өлкә картина галереяһында, Томск дәүләт художество музейында, Ҡаҙан ҡалаһындағы Милли-мәҙәни үҙәктә һәм Мәскәү ҡалаһындағы Шиһабетдин Мәржәни фондында танышырға мөмкин. Күберәк автор графика өлкәһендә эшләй (пастель, граттография, линогравюра, ҡатнаш баҫма графика, китап графикаһы һәм башҡалар). Бөгөнгө көндә Өфөлә йәшәй һәм ижад итә, 2-се балалар художество мәктәбендә уҡыта. 

Әйтергә кәрәк, Рәсәй рәссамдар союзының Башҡортостан төбәк бүлексәһе БР әҙәбиәт, сәнғәт, мәҙәниәт өлкәһендәге Салауат Юлаев исемендәге дәүләт премияһына 2012 йылда дәғүә итеүселәр исемлегенә 29 әҫәрҙән торған «Песнь об Урале» әҫәрҙәр циклы өсөн рәссам-график Салауат Ғиләжетдиновты күрһәтте.

«Песнь об Урале» тип аталған әлеге күргәҙмә ике эпик теманы берләштерә. Улар — «Бөйөк дала» һәм «Ете ҡыҙ».

Картиналарҙағы ғәҙәти булмаған йөҙ-ҡиәфәттәргә аңлатма биреп, автор былай ти:

— Төрки халыҡларҙа портрет сәнғәте булмаған, шуға күрә йөҙҙәрҙе тик яҙма әҫәрҙәр буйынса ғына күҙаллап була. Бында ла шиғриәттән, халыҡ ауыҙ-тел ижадынан йыйып алынған образдар тәҡдим ителде. Картиналар барыһы ла үзенсәлекле ысул менән яҙылған. Ябай тел менән әйткәндә, ҡағыҙҙы бутҡа кеүек иҙеп, һуңынан шул массаны йәйеп ҡатырам. Рәсемдәр шул ҡағыҙ өҫтөндә баҫылып яҙыла, икенсе төрлө әйткәндә баҫма графиканың бер төрө был, авангард графика. 

Һәр картина тарих, бөгөнгө йәшәйеш, киләсәк, тормоштоң серлелеге тураһында уйланыуҙарға этәрә. 

Әлеге күргәҙмә 28 октябргә тиклем дауам итәсәк. 29 картинаның ҡайһы берҙәре генә төрлө күргәҙмәләрҙә булып өлгөргән. Чебаксар, Ҡазан, Саратов һәм башҡа ҡалаларҙа күрһәтелгән улар.

Ошоға тиклем Салауат Ғиләжетдинов шәхси күргәзмәһе 2002 йылда булган. Әлегеһе — алтынсыһы. 

Фотогалереяға күсергә

Автор: Гөлназ Ишемғужина
«Башҡортостандың мәҙәни донъяһы» порталы