Бөгөн, 1 июль, М.В. Нестеров исемендәге Башҡорт сәнғәт музейында уникаль проект – Рәсәй, Монголия һәм Ҡытай оҫталарының һынлы сәнғәт, графика һәм скульптура өлкәһендәге эштәренән торған Халыҡ-ара сәнғәт күргәҙмәһе асыла. Уны РФ Мәҙәниәт министрлығы, БР Мәҙәниәт министрлығы, Рәсәйҙең Рәссамдар союзы, В.И. Суриков исемендәге Мәскәү дәүләт академия һынлы сәнғәт институты ойоштора. Сара Еңеүҙең 70 йыллығына арнала.

БР Рәссамдар союзынан хәбәр итеүҙәренсә, проект авторы – Монголия Президенты Цахиагийн Элбэгдорж.

Күргәҙмә өс өлөштән тора: «Рәсәй Рәссамдар союзы фондынан 1941-1945 й.й. фронт һүрәттәре». Бында һуғышта ҡатнашҡан һәм эштәре шул темаға арналған рәссамдарҙың һүрәттәрен күреп буласаҡ; икенсе бүлектә Монголия оҫталарының һуғыш тематикаһына арналған иң яҡшы эштәре ҡуйыласаҡ; өсөнсө бүлектә В.И. Суриков исемендәге Мәскәү дәүләт академия һынлы сәнғәт институтын тамамлаған Ҡытай рәссамдарының әҫәрҙәренә тамаша ҡылыу мөмкинлеге ҡаралған.