Редик Фәсхетдинов – 50 йылдан ашыу ғүмерен сәнғәткә бағышлаған күренекле баянсы. Ижад юлын Фәйзи Ғәскәров исемендәге ансамблдә башлай. Бәхти Ғайсин, Рамазан Йәнбәков, Радик Гәрәев, Ильфак Смаков кеүек мәшһүр сәнғәт әһелдәре, Флүрә Килдейәрова, Нәзифә Ҡадырова, Азат Айытҡолов, Миңлеәхмәт Ғәйнетдинов, Рәшиҙә Туйсина, Рәйес Вәғизов кеүек башҡорт эстрадаһы йондоҙҙары менән бер сәхнәлә оҙаҡ йылдар сығыш яһай, шулай уҡ тәүге “Дуҫлыҡ” вокаль-инструменталь төркөм составында ла эшләй.

Виртуоз баянсының сығыштарын халыҡ ҙур түҙемһеҙлек менән көтөп ала. Аккомпаниаторлыҡ менән бер рәттән үҙенең концерттары менән дә тамашасы күңелен арбай. Донъя халыҡтары, классик, эстрада әҫәрҙәрен, башҡорт, татар халыҡ көйҙәрен бар матурлығында тамашасыға еткерә ул.

Редик Фәсхетдинов 2004-2010 йылдарҙа республикабыҙҙың уникаль музыкаль коллективтарының береһе БР-ҙың халыҡ ҡоралдары милли оркестрында эшләй. “Юнеско” йүнәлеше буйынса Рәсәй артистары йыйылма төркөмө составында Азия, Африка, Европа, Скандинавия илдәрендә һәм Германияла, Ҡытайҙа, Һиндостанда уҙғарылған Рәсәй мәҙәниәте көндәрендә сит ил тамашасыларын башҡорт моңона күмә Редик Фәсхетдинов. Профессор, баянсы Владимир Суханов менән хатта экваторҙы, Радик Гәрәев, “Дуҫлыҡ” ансамбле менән төньяҡ полюсты ла киҫеп сыға ул!

Мәшһүр виртуоз баянсы Редик Фәсхетдиновтың ижад кисәһенә рәхим итегеҙ, дуҫтар!

Сығанаҡ: филармония сайтынан алынды.