Оҙайлы тәнәфестән һуң, популяр йыр бәйгеһе-«Гәлсәр һандуғас-2015» телевизион йыр конкурсы үҙ эшен дауам итә. Ошо уңай менән «Рәсәй — Башҡортостан» телеканалы «Башҡортостан» дәүләт концерт залында конкурста еңеүселәрҙең ҡатнашлығында гала-концерт үткәрҙе. Гала-концертта «Йыл йыры» (Йәмил Баймырҙин), «Йыл асышы», «Өмөт», «Тамашасылар һөйөүе призы», «Мәҙәниәтте һәм сәнғәтте үҫтереүгә өлөш индергән өсөн» номинацияларында еңеүселәр билдәләнде. Лауреаттарҙың барыһына ла иҫтәлеккә гәлсәр һандуғас статуэткаһы һәм аҡсалата бүләк тапшырылды. Быйылғы концерт шуныһы менән үҙенсәлекле булды, «Гәлсәр һандуғас» ҡанаты аҫтында» тип аталған яңы проектта сәләмәтлек мөмкинлектәре сикләнгән балалар ҙа ҡатнашты.