20 ноябрҙә Әлшәй районы Раевка ҡасабаһында Башҡортостан Республикаһының атҡаҙанған мәҙәниәт хеҙмәткәре Розалия Солтангәрәйева призына Төбәк-ара “Сәсәндәрем, килегеҙ!” сәсәнлек бәйгеһе үтәсәк.

Башҡортостан республикаһы Мәҙәниәт министрлығы, Республика халыҡ ижады үҙәге, Башҡортостан Республикаһы башҡорт ҡатын-ҡыҙҙары йәмғиәте, Башҡортостан Республикаһы яҙыусылар союзы һәм Әлшәй муниципаль район администрацияһы ойошторған бәйгелә эпос башҡарыусылар, ҡобайырсылар, поэтик һүҙ һәм йыр ижад итеүсе оҫталар көс һынашасаҡ.

Күренекле яҙыусыларҙың, мәҙәниәт һәм сәнғәт әһелдәренән, фольклорист-ғалимдарҙан торған жюри составы конкурсанттарҙы 16 йәшкә тиклемле һәм 16 йәштән өлкән булған ике категорияға бүленеп баһалаясаҡ.

Бәйге сәсәнлек традицияларын, башҡорт халҡының ауыҙ-тел ижады жанрҙарын тергеҙеү һәм һаҡлау, сәсәнлек, үҫеп килгән быуында импровизация сәнғәте нигеҙҙәрендә милли мәҙәниәткә һаҡсыллыҡ тәрбиәләү йәһәтенән мөһим сараларҙың береһе булараҡ, матур халыҡ байрамына әүерелер тигән өмөттә, барығыҙҙы ла бәйгегә саҡырабыҙ.

Сығанаҡ: "Ашҡаҙар" радиоһы