Салауат дәүләт башҡорт драма театры яңы театр миҙгелен асыу һәм театрҙың был сезонға пландары тураһында һөйләшеү өсөн ҡала матбуғат саралары менән берлектә пресс-конференция үткәрҙе. Унда театрҙың етәксеһе Башҡортостандың атҡаҙанған сәнғәт эшмәкәре Наилә Сәфәрғолова, етәксе урынбаҫары Рөстәм Фазылов, Рәсәйҙең атҡаҙанған, Башҡортостандың халыҡ артисы Миндулла Иҙрисов һәм театрҙың әҙәби-драматик бүлеге етәксеһе Эльвира Исҡужина ҡатнашты.

Быйыл театр 80 йыллыҡ юбилейын билдәләй. Шуға ла киләсәк сезон төрлө матур сараларға бай булмаҡсы. Беренсенән, театр драматург Туфан Миңнуллиндың яҡты иҫтәлегенә арналған хәтер акцияһы сиктәрендә әҙиптең әҫәрҙәре буйынса ҡуйылған өс спектакль менән Туфан ағайҙың тыуған яҡтарында сығыш яһаясаҡ. Шулай уҡ яҙ көнө драматик спектаклдәрҙәге йырҙарҙы башҡарыусы актерҙар араһында республика асыҡ конкурсы үткәрәсәк. Был бәйге беренсе тапҡыр уҙғарыла. Ул яңы таланттар асырға, йырсы актер, спектаклдәрҙе музыкаль яҡтан биҙәп, көй-йырҙар ижад итеүсе композиторҙарҙы билдәләргә ярҙам итер. Тағы ла театр етәкселәре тарафынан шәп ижади проект уйланылған. Ул да булһа Башҡортостан һәм Татарстандың бәләкәй ҡалалары араһында Төбәк-ара театр фестивале. Был сараны үткәреү матур бер йолаға әүрелер, тигән өмөттәбеҙ. Тамашасыларҙы ҡыҙыҡлы һәм мауыҡтырғыс премьералар менән ҡыуандырырға онотмабыҙ. Иң талантлы режиссерҙар үҙ ижадтары менән аралашыр. Ғөмүмән, яңы сезонға яңы өмөттәр бағлайбыҙ,- тип хәбәр иттеләр театрҙың реклама бүлегенән.

«Башҡортостандың мәҙәни донъяһы» порталы