Әхмәтзәки Вәлиди исемендәге Милли китапханала «Салауат Юлаев» китабының исем туйы үтте. Милли батырыбыҙҙың тыуыуына 260 йыл тулыу айҡанлы сыҡҡан китап Эстонияла донъя күргән. Баҫма Эстонияның аҙ һанлы милләттәре берләшмәһе, Палдиски ҡалаһының ҡала хакимиәте һәм «Урал» мәрхәмәтлек фонды ярҙамында сыҡҡан. Идея авторы һәм төҙөүсеһе – Таллин ҡалаһындағы «Ағиҙел» башҡорт мәҙәниәте йәмғиәте етәксеһе Флүзә Хәйруллина.

Флүзә апай әйтеүенсә, Салауат хаҡында китап сығарыу уның күптәнге хыялы:

- Дөрөҫөн әйткәндә, ябай эстон халҡы милли геройыбыҙ хаҡында ул хәтлем белеп бөтмәй, шуға күрә лә был китап кәрәкле тип иҫәпләйем. Рус һәм эстон телендә сығыуы ла отошло, был уҡыусыларҙы күберәк йәлеп итер тигән өмөт уята. Байтаҡ архив материалдары, Салауаттың иң билдәле шиғырҙары тупланды, фотоһүрәттәргә лә бай. Эстонияның Мәҙәниәт министрлығына һәм «Урал» мәрхәмәтлек фондына оло рәхмәтемде еткерәм. Киләсәктә тағын да материалдар туплап, китапты яңынан баҫтырырға тигән уй бар.

Флүзә Хәйруллинаның улы Илнур Мостай Кәримдең «Салауат. Өн аралаш ете төш» драмаһын эстон теленә тәржемә иткән:

- Мин профессиональ тәржемәсе түгел, шуға күрә лә ҡыйын ваҡыттар ҙа булды, - тип белдерҙе ул. 1-се курс студенты өсөн был бик маҡтаулы. Афарин, Илнур!

ТЕА нәшриәте вәкиле Сильви-Айре Вилло ла үҙ фекерҙәре менән бүлеште:

- Мин Башҡортостанда тәүге тапҡырмын, килергәме-юҡмы тип оҙаҡ уйландым һәм бындай форсат тормошта бер тапҡыр ғына була тип, тәүәккәлләнем. Шул хәтлем бай тәъҫораттар алдым. «Салауат йыйыны»нда, батырҙың музейында булдыҡ, килеүемә ҡыуанып бөтә алмайым. Ойоштороусыларға ҙур рәхмәт!

Билдәле шағирҙар Ҡәҙим Аралбаев һәм Лариса Абдуллина республика халҡы исеменән ҡунаҡтарға оло рәхмәттәрен еткерҙеләр. Салауаттың эстон телендә яңғыраған шиғырҙары сараға ҡабатланмаҫ йәм өҫтәне.

Әйткәндәй, Эстонияла китаптың исем туйы 10-12 июль үтәсәк, унда Башҡортостандан да делегация ҡатнашасаҡ.