25 декабрь көнө Мәжит Ғафури исемендәге Башҡорт дәүләт академия драма театры янындағы «Самрау» Балалар театр студияһы Яңы йыл байрамы уңайынан үҙенең өр-яңы спектаклен тәҡдим итте.

Шыршы байрамын балалар бигерәк тә ярата, ә яңы йыл сюжетына ҡоролған серле, мөғжизәле әкиәттә ҡатнашып, ата- әсәләре, класташтары, уҡытыусылары, театр артистары алдында уйнау бәләкәй артистарға икеләтә шатлыҡ һәм ҙур һынау булды. Студия тәрбиәләнеүселәренең йөҙҙәрендә был көндө нур балҡыны, улар айырыуса йәнле уйнаны, йырланы, бейене. «Гөлнәзирә менән Тимурҙың Яңы йыл мажаралары» спектакленең премьераһын барыһыла ҡыҙыҡһынып ҡараны. Төп ролдәрҙе бик оҫта итеп Гөлнәзирә Буранҡаева менән Ильхан Әхмәтйәнов башҡарҙы, ә Ҡарһылыуҙы бик матур итеп 6 йәшлек кенә Азалия Рахманғолова уйнаны.

Спектакль бөткәс, йәш артистар менән бер рәттән баш эйергә уларҙың педагогтары - Суфия Ҡорбанғәлиеева (сәхнә теле), Диләрә Иҙелбаева (вокал), Илсур Ҡаҙаҡбаев (режиссёр), Урал Әминев (бейеү ҡуйыу), Руслан Хайсаров (сәхнә хәрәкәте), студия етәксеһе һәм сценарий авторы Зилә Баймырҙина сыҡты. Яңы йыл тамашаһы балалар күңеленә хуш килде!