Өфөнән «Бэби-шлягер» өлгөлө вокал-эстрада студияһы Санкт-Петербургта үткән халыҡ-ара конкурстан ҙур еңеү менән ҡайтты. 1993 йылда ойошторолған «Бэби-шлягер» төркөмө Өфөнөң Ленин районы балалар ижады үҙәгендә эшләп килә.

Сәхнә йондоҙо булыу еңел түгел, балалар йырҙың һәр юлын бер нисә тапҡыр ҡабатлай, хәрәкәттәрҙе камиллаштыра. Ошо тырышлыҡ һәм түҙемлек беҙгә йөҙәрләгән бәйгесе араһында алдынғылыҡты яуларға ярҙам итте лә инде, ти еңеүселәр.

«Бэби-шлягер» студияһында 5 йәштән 16 йәшкә тиклемге балалар шөғөлләнә, улар бында йыр-бейеү серҙәрен үҙләштерә, үҙҙәрен сәхнәлә тоторға өйрәнә. Конкурстар иһә тәжрибә уртаҡлашыу, оҫталыҡты камиллаштырыу йәһәтенән ҙур әһәмиәткә эйә, ти улар.

Ике тиҫтә йыл элек барлыҡҡа килгән «Бэби-шлягер» студияһының даны хәҙер республикала ғына түгел, Рәсәй кимәлендә лә киң билдәле. Өфөлә үткән бар сараларҙың уртаһында ҡайнаған йәш йондоҙҙар Рәсәй, халыҡ-ара конкурстарҙа ла йыш сығыш яһай. Был юлы «Бэби-шягер»ҙар Санк-Петербург ҡалаһында үткән бөтә донъя бәйгеһенән ҙур еңеү менән ҡайтты.

Һәр баланың күңеле ижад өсөн асыҡ, уға дөрөҫ йүнәлеш биреү генә мөһим, тигән фекерҙә студия етәксеһе. Ә еңеүҙәр инде ҡанат ҡуя, тағы ла бейегерәк үрҙәргә этәрә һәм бар яҡлап та камиллашырға ынтылыш өҫтәй.