Бөгөн Башҡортостандың атҡаҙанған мәҙәниәт хеҙмәткәре, З. Биишева һәм Ш. Хоҙайбирҙин исемендәге премиялар лауреаты, Башҡортостан Республикаһы менән Рәсәй Федерацияһының Яҙыусылар союзы ағзаһы, күренекле шағир Рәмил Йәнбәккә – 60 йәш.

Әҙипте тыуған көнө менән ихлас ҡотлап, киләсәктә лә халыҡҡа хеҙмәт иткән илһамлы һуҡмаҡтан атлап, ижад толпарында яңынан-яңы үрҙәр яулауын теләйбеҙ.

Ул 1952 йылдың 10 авгусында Күгәрсен районының Дауыт-Ҡайып ауылында тыуған.

Тыуған ауылында - башланғыс, Теләүембәттә – һигеҙ йыллыҡ, Өфөләге 1-се интернат-мәктәптә урта белем ала. Бер йыл тыуған колхозында эшләй, Башҡорт дәүләт университетының филология факультетына уҡырға инә. Ошонда әҙәби ижадҡа ылыға, «Шоңҡар» түңәрәгендә шөғөлләнә, тәүге шиғырҙарын, мәҡәләләрен баҫтыра.

Бишенсе курста уҡып йөрөгәндә уны «Башҡортостан пионеры» (хәҙер «Йәншишмә») гәзите редакцияһына эшкә саҡыралар. Ошо гәзит редакцияһында ун һигеҙ йыл эшләп, баҫманың баш мөхәрриренә тиклем күтәрелә. Артабан Рәмил Йәнбәк «Китап» нәшриәтендә баш мөхәррир, директор була, БР Яҙыусылар союзы идараһы рәйесе урынбаҫары итеп һайлана. «Ватандаш» журналын ойоштороуҙа әүҙем ҡатнаша, унда бер нисә йыл баш мәхәррир урынбаҫары булып эшләй. Бөгөнгө көндә - «Ағиҙел» журналының баш мөхәррир урынбаҫары.

 Р. Йәнбәктең әүҙем ижад осоро 80-се йылдар аҙағында башлана. Баштараҡ тыуған ер, мөхәббәт, кешеләр араһында мөнәсәбәттәр тураһында әҫәрҙәр яҙһа, һуңғы йылдарҙа фәлсәфәүи темаларға: йәшәү һәм үлем, үткән һәм киләсәк, ваҡыт, йыһан, донъя ҡәҙере һ.б. тураһында яҙа. 

Рәмил Йәнбәк һигеҙ шиғри йыйынтыҡ һәм бер публицистик китап авторы.