24 март «Нефтселәр» мәҙәниәт һарайында Шәреҡ донъяһының күркәм байрамдарының береһе – «Науруз» үтте. Науруз – ҡояш календары буйынса, яҙғы көн менән төн тигеҙлегенә тура килгән Яңы йыл байрамы, Ҡаҙағстан, Урта һәм Кесе Азия, Ирандың фарсы һәм төрки телле халыҡтары, шулай уҡ башҡорттар һәм татарҙар араһында таралған.

Байрамға килгән ҡунаҡтарҙы милли костюмдарҙа сәк-сәк һәм ҡымыҙ менән ҡаршы алдылар. «Асанай», «Хәтирә» фольклор ансамблдәре йыр-моң бүләк иттеләр. Мәҙәниәт һарайы фойеһында мосолман халыҡтарының мәҙәниәтен һәм милли аш-һыуын сағылдырған күргәҙмә эшләне. Матур байрам менән Дәүләт Думаһы депутаты З.Рәхмәтуллина, БР Мәҙәниәт министрының 1-се урынбаҫары В.Латыпова, Рәсәй мосолмандарының баш мөфтөйө Т.Таджуддин тәбрикләне. Концертта республиканың бөтә райондарынан фольклор ансамблдәр сығыш яһаны. Тамаша халыҡ йырҙарына, йолаларға бай булды.