Бөгөн, 9 февралдә Мәжит Ғафури исемендәге Башҡорт академия драма театры Рәми Ғариповтың яҡты иҫтәлегенә арнап, «Февраль. Буран…» тип исемләнгән әҙәби проект – шағир донъяһына сәйәхәт тәҡдим итә.

«Башҡортостандың мәҙәни донъяһы» порталы хеҙмәткәрҙәренә премьера алды тамашаһын ҡарау бәхете тейҙе.

Декорацияларҙы, уйнаясаҡ актерҙарҙы күреү менән үк театр сәхнәһенә яңы һулыш өрөлгәне күҙгә ташланды. Спектаклдең ҡуйылышы, үҙенә тартыу көсө әйтеп аңлатҡыһыҙ. “Мең ҡабат ишеткәнсе, бер мәртәбә барып күр” тиҙәр бит. Нимә генә тиһәң дә, күҙҙәргә йәш төйөлдөргән дә, нәфрәт уятҡан да ерҙәре бар тамашаның. 

«Илем, халҡым, телем» тип янып йәшәгән әҙиптең тормошона мөрәжәғәт итеү юҡҡа түгел. 2012 йылға теарҙың репертуарын барлағанда тыуҙы Рәми Ғариповтың иҫтәлегенә шиғри кисә үткәреү теләге. Был хаҡта әҙәбиәт бүлеге хеҙмәткәрҙәре, артистар менән кәңәшләшкәндән һуң, үҙебеҙҙең идеяларыбыҙҙы әйтеп, Зөһрә Бураҡаеваға мөрәжәғәт иттек. Тамашала театрҙың барлыҡ тигәндәй актерҙары ла үҙ теләктәре менән ролдәрҙе һорап алдылар. Сөнки һәр кемдең күңелендә Рәми йәшәй. Киләсәктә ул тулы спектакль булып сәхнәгә сыҡһа сикһеҙ ҡыуаныр инек...», – ти театрҙың директоры һәм тамашаның режиссеры Хөрмәтулла Үтәшев.

Әҙәбиәт бүлеге етәксеһе Рәмилә Йәһүҙина әйтеүенсә, Рәми Ғариповтың көндәлеге буйынса әҙерләнгән был үҙенсәлекле сараны күреп ҡалырға теләүселәр бик күп. Билеттар һатылып бөткән.

Сәхнәлә тамашасылар шағирҙың ҡатынын, ҡыҙын, тарихи шәхестәрҙе уйнаған ижади көстәрҙе күрәсәк. Ә төп ролде - шағирҙың эске донъяһын, кисерештәрен, һыҙланыуҙарын - йәш актерҙар еткерә. Үҫмер сағын Фирғәт Ғарипов күҙ алдына баҫтырһа, йәшлек йылдарын Артур Кәбиров уйнай. Бөйөк шәхестең тормошона, ижадына байҡау яһаған уникаль проектта Рәми Ғариповтың бик күп шиғырҙары һәм шиғырҙарына яҙылған йырҙар яңғыраясаҡ.

"Башҡортостандың мәҙәни донъяһы" порталы