Бөгөн, 29 декабрҙә, билдәле шағир һәм драматург Рафаэль Сафин йәшәгән (Өфө ҡалаһы, Ғафури урамы 25/1) йортта, уның иҫтәлегенә таҡтаташ асыу тантанаһы уҙҙы. Был йортта әҙип 1987-2002 йылдарҙа йәшәгән.
Билдәле шағир һәм драматург Рафаэль Сафинға 16 февралдә 80 йәш тулыр ине. Ул «Йәнбикә», «Ҡыр ҡаҙҙары», «Тилекәй» пьесалары аша әҙәбиәт һәм театр һөйөүселәргә яҡшы таныш. Башҡорт академия драма театры уларҙы 70-се йылдарҙа сәхнәләштергән.
Байрам сараһында Өфө хакимиәте башлығы урынбаҫары Сынтимер Баязитов, СССР-ҙың халыҡ артисткаһы Гөлли Мөбәрәкова, Башҡортостандың мәҙәниәт министры урынбаҫары Рәнис Рәйес улы Алтынбаев, Башҡортостан Яҙыусылар ойошмаһы етәксеһе вазифаһын ваҡытлыса алып барған, БР халыҡ шағиры Ҡәҙим Аралбай, БР халыҡ шағиры Рауил Бикбаев, М. Ғафури исемендәге Башҡорт дәүләт академия драма театры директоры Хөрмәтулла Үтәшев һәм башҡа ҡунаҡтар, студенттар, уҡыусылар ҡатнашты.

«Башҡортостандың мәҙәни донъяһы» порталы