БР Яҙыусылар союзында шағирә, журналист, йәмәғәт эшмәкәре Гүзәл Ситдиҡованың ижад кисәһе үтте. Сараға шағирәнең ижадын һөйөүселәр, ҡәләмдәш дуҫтары, яҡындары һәм туғандары йыйылды.

Гүзәл Ситдиҡова Белорет районының Инйәр ҡасабаһында уҡытыусы ғаиләһендә донъяға килә. Шуғалыр ҙа ул һөнәре итеп тәүҙә уҡытыусылыҡты һайлай. Әммә әҙәбиәткә булған һөйөүе уны балалар өсөн шиғырҙар ижад итеүгә, журналистика өлкәһенә алып килә.

Яҙмыш Гүзәл Ситдиҡоваға барыһын да йәлләмәй биргән. Был һәләтле, эшһөйәр ханымдың киң яҡлы эшмәкәрлегендә, бай ижадында ла асыҡ сағыла. Ошо турала Гүзәл Рамаҙан ҡыҙының ҡәләмдәштәре йылы фекерҙәре менән уртаҡлашты.

Гүзәл Ситдиҡова бар булмышы менән халҡым, телем тип янып йәшәгән шәхестәрҙән. Берәүҙәр уның шиғриәтен үҙ итһә, икенселәр илһөйәрлек, мөхәббәт менән һуғарылған әҫәрҙәрен яҡын күрә. Әҙибә рухиәтте, башҡорт халҡының дини мәҙәниәтен үҫтереүгә лә ҙур өлөш индерә. Иң мөһиме - уҡыусыһы һөйөүен яулай.

«Башҡортостандың мәҙәни донъяһы» порталы